ഹൃദയദിനം

ഹൃദയത്തില്‍ നിന്നും
വാതില്‍ തുറന്ന്
വെളുത്ത പ്രാവുകൾ
സമാധാനത്തിലേക്ക്
യാത്രയാകുന്നു

ജീവന്‍
ഒളിപ്പിച്ച് വെച്ചിരിക്കുന്നത്
ചെറിയ പ്രാവിൻ കൂട്ടിലാ
അതിന്റെ പേരാണ്
ഹൃദയം

ജീവനും
മരണവും
തമ്മിലുള്ള
യുദ്ധം
ഇടയ്ക്ക്
മരണം ജയിക്കും
ഇടയ്ക്ക് ജീവനും
യുദ്ധം കഴിഞ്ഞാല്‍
പ്രാവുകൾ പറക്കണം

പ്രാവിന്റെ കൂട്ടിൽ
ഹൃദയം മുട്ടയിട്ടു
കുഞ്ഞുങ്ങളെ വിരിയിച്ചു
വിരിഞ്ഞിറങ്ങിയ
ഹൃദയങ്ങള്‍ പ്രാവിൻ കൂടുകൾ തേടി യാത്രയായി
ചില ഹൃദയങ്ങള്‍ക്ക്
കൂടുകൾ കിട്ടാതെ അലഞ്ഞു
ചില ഹൃദയങ്ങള്‍
കഴുകന്‍ കൂട്ടിലും
ചിലവ പരുന്തിൻ കൂട്ടിലും
പ്രാവിൻ കൂടുകളിൽ നിന്നും
കൂടു തേടി യാത്രയായി

അങ്ങനെ ചിലരുടെ
ഹൃദയം പരുന്തിൻ കാലില്‍ പോയി
ചിലര്‍ മറ്റു പല വഴിക്കും

ചില ഹൃദയം സ്വയം നഷ്ടപ്പെട്ട്
മരണത്തിന് കീഴടങ്ങി

അപ്പോഴേക്കും
പ്രാവിൻ കൂട്
ശൂന്യമായിരുന്നു

ബിൻഗോ

കുറെ നേരമായി
വയറ്റില്‍ നിന്നും ഒരു ഗളഗള ശബ്ദം
തലയില്‍ അൽപം എരിപൊരി

ജീൻസും ഷര്‍ട്ടും നാറ്റം തുടങ്ങിയിരിക്കുന്നു
ഉണ്ടായിരുന്ന മൊബൈല്‍ വിറ്റാല്‍ ആവശ്യക്കാരനാണെന്ന് കരുതി പണം കുറച്ചേ കിട്ടൂ

പത്തു രൂപ ബാക്കിയുള്ളത്
വിശപ്പിന് ആശ്വാസമല്ല
ആകെ ആശ്വാസം കുറച്ച് വെള്ളം കഴിച്ചു പിടിച്ചു നിർത്താം എന്ന പ്രതീക്ഷയാണ്

അഞ്ചു രൂപയുടെ രണ്ടു ബിൻഗോ വാങ്ങി
ഇനി പോക്കറ്റില്‍ ഒന്നുമില്ല
അരകിലോ പഴം വാങ്ങാമെന്ന് വെച്ചാൽ കിലോ എൺപത്...
പത്തു രൂപയ്ക്ക് ഒരു നേന്ത്ര പഴം പോലും കിട്ടില്ല

മരിക്കുമെന്നു ഉറപ്പിച്ചു
ജീവിക്കാനാവില്ല ....!!
ഇല്ല ...!
മൊബൈല്‍ വിറ്റാല്‍ പിന്നെ ഞാനില്ല ..!!

എന്റെ വിശപ്പിനേക്കാൾ ഞാന്‍ എന്റെ മൊബൈലിനെ പ്രണയിക്കുന്നു...

പാദങ്ങൾ

പാദങ്ങൾ ചുമന്നിരുന്നത് അജാനുബാഹു
മുഷിഞ്ഞ കൈലിമുണ്ട്
അലക്ഷ്യമായ മുടി
എന്തോ ഭയക്കുന്ന മുഖം

എതിരെ വരുന്നതും പാദങ്ങൾ
ചെരുപ്പ് ധരിച്ചത്
ധരിക്കാത്തത്
ചെറുതും വലുതുമായ പാദങ്ങൾ

കോൺക്രീട് സ്ലാബുകൾ
കരിങ്കല്ലുകൾ
മണ്ണ്
മണല്‍ത്തരികൾ
മണ്ണ്
മലം
അഴുകിയ പഴങ്ങൾ
ഉണങ്ങിയ കമ്പുകൾ
ഉറങ്ങി കിടക്കുന്ന പട്ടികൾ
ഹോട്ടൽ അവശിഷ്ടങ്ങള്‍...
ആ പാദങ്ങൾ ചുംബിച്ചുകൊണ്ടിരുന്നു

ദൂരം ഒരുപാടു പിന്നിട്ടിട്ടും എത്ര ദൂരം താണ്ടി..?
പിന്തിരുഞ്ഞു നോക്കുന്നില്ല
ആ യാത്ര എങ്ങോട്ടായിരിക്കും...? 
ആകാംക്ഷയോടെ കണ്ണുകള്‍ പിന്തുടർന്നു

തീവണ്ടി പാതയിൽ അവസാനിച്ചു

ആദ്യം കണ്ട ട്രാക്കിൽ കയറി കുറുകെ കിടന്നു

ദൂരെ നിന്നും കൂകൂ വിളി കേൾക്കുന്നുണ്ട്

പ്രതീക്ഷയോടെ കണ്ണുകള്‍ അടച്ചു പിടിച്ചിരിക്കുന്നു
നിമിഷങ്ങള്‍
ജീവനും മരണവും മുഖാമുഖം കാണുന്ന അസുലഭ നിമിഷം

***********$********$*******$******

പലിശക്കാരൻ ഭാര്യയെ സ്നേഹിച്ചു
പതിനാലുകാരി മകളെ രുചിച്ചു
രണ്ടു പേരും സുഖിച്ചു
മകള്‍ ദുഃഖിച്ചു
അറിഞ്ഞു വന്ന പാദങ്ങൾ ഭാര്യയെ ചവിട്ടി കൊന്നു
മകള്‍ വെട്ടേറ്റ് മരിച്ചു
പലിശക്കാരൻ വെട്ട് കൊണ്ട് ഓടി രക്ഷപ്പെട്ടു

***********$************$********$*******

തൊട്ടടുത്ത ട്രാക്കിൽ രണ്ടായി മുറിഞ്ഞു കിടക്കുന്ന ഇരുപത്തിരണ്ട് വയസ്സുള്ള സ്ത്രീയുടെയും മൂന്നു വയസ്സുകാരിയുടെയും പാദങ്ങളുടെ നിലവിളി ചൂളം വിളിച്ചു വരുന്ന തീവണ്ടിയുടെ ശബ്ദത്തില്‍  ആ പുരുഷ പാദങ്ങളുടെ തലച്ചോറ് കേട്ടു കാണില്ല  

അല്ലെങ്കിലും പാദങ്ങൾക്ക് തലച്ചോറില്ലല്ലോ